12:13 PM
NPNG(MyanmarP)
အောက်ဖော်ပြပါ ပုံများသည် ကျွန်တော်တို့ ငယ်ငယ်တုန်းက အသုံးပြုခဲ့တဲ့ ပိုက်ဆံတွေပါ။ ဒီငွေကြေးတွေသည်လည်း ပြည်ထောင်စု မြန်မာနိုင်ငံတော် ဗဟိုဘဏ်က ထုတ်ခဲ့တာပါ။ ရာစုတွေ ပြောင်းလာတဲ့အခါ ခေတ်တွေ စနစ်တွေကို လိုက်ပြီး ငွေကြေးတန်ဖိုးတွေ ပြောင်းလာကြတယ်။ စားဝတ်နေရေးအတွက် ပိုက်ဆံရှာရတယ်။ အခကြေးငွေနဲ့ သတ်မှတ်ထားတဲ့ လောကထဲက ပစ္စည်းတွေအတွက် ငွေဟာဒုတိယ ဘုရားသခင်လို့ တင်စားကြပါတယ်။ ဒါပေမယ့် ကျွန်တော် စိတ်မကောင်းသော အရာတစ်ခု ရှိပါတယ်။ အဲဒါက မြန်မာငွေကြေးကို ကျပ် ဟုသုံးပါသည်။ အမေရိကန် ငွေကြေးကို ဒေါ်လာ ဟုသုံးပြီး တခြားနိုင်ငံတွေသည်လည်း ဒီလိုပဲ ရှိပါလိမ့်မည်။ ထူးခြားချက်က ကျွန်တော်တို့ နိုင်ငံမှာ တစ်ကျပ် နှစ်ကျပ်ခေတ် မရှိတော့ဘူးဗျာ။ ပြည်ပ နိုင်ငံခြားဆိုတဲ့ နိုင်ငံတွေမှာ တစ်ကျပ်နှစ်ကျပ် အကုန်သုံးလို့ရတုန်းပဲ။ မြန်မာငွေကြေး တစ်ကျပ်နှစ်ကျပ် ကလေးပေးတာတောင် မယူဘူး။ ကလေးတွေ အပြစ်လည်း မဟုတ်ပါဘူး။ ကိုယ်ပေးလိုက်တဲ့ တစ်ကျပ်နှစ်ကျပ် ကလည်း မြန်မာနိုင်ငံမှာ ဘာဝယ်စားလို့ ရမှာလဲလို့ ပြန်စဉ်းစားမိတော့ သဘောပေါက်သွားပါတယ်။ ကျွန်တော်တို့ ငယ်ငယ်တုန်းက ကျောင်းတက်တာ တစ်ကျပ်တောင်မရဘူး။ တစ်မတ် ငါးမှုးလောက်နဲ့ ကျောင်းမှာပျော်နေခဲ့တာပါ။ အခုခေတ်နဲ့ ဘာမှ မဆိုင်တော့ပါဘူးဗျာ...။
သို့ပေမယ့်လည်း နိုင်ငံခြားမှာ ငွေတွေ အထပ်လိုက် ကိုင်စရာမလိုပဲ နေရာစုံသွားလို့ ရတယ်။ မုန့်ဝယ်စားလို့ ရတယ်။ ကလေးတွေအတွက် ကစားကွင်းတွေ အခမဲ့ရှိတယ်။ ကုန်တိုက်တွေ နေရာစုံမှာရှိတယ်။ လူတိုင်းစည်းစနစ် ရှိကြတယ်။ ငွေရှင်းတဲ့စနစ် ကောင်းတွေရှိတယ်။ အလုပ်လုပ်ကြတယ်။ ရတဲ့လခလေးနဲ့ တစ်ကျပ်နှစ်ကျပ်ကို တန်ဖိုးထားတယ်။ ကျွန်တော်တို့ နိုင်ငံခြားမှာနေတုန်းက ကိုယ့်လူတွေက တစ်ကျပ်နှစ်ကျပ် ပြုတ်ကျသွား ပြန်ကောက်တာ မဟုတ်ဘူး။ နိုင်ငံခြားသား တစ်ယောက် ဈေးလာဝယ်တယ်။ ငှက်ပျောသီး တစ်ကီလို ဘယ်လောက်လဲ သူမေးတဲ့။ ကျသင့်ငွေ ထုတ်ရှင်းတဲ့အခါ သူ့ပိုက်ဆံအိတ်မှ ဆယ်ပြားစေ့ နှစ်စေ့လောက် ကျသွားတာကို သေချာ လိုက်ကောက်နေတယ်။ ယခင်ကိုယ့်လူတွေ ပြန်မကောက်တဲ့ ပိုက်ဆံအကြွေစေ့ နှစ်စေ့တောင် အစစ်ပါသွားသေးတယ်။ သြော်...သူတို့တွေ တန်ဖိုး ထားတတ်လိုက်တာ... ဒို့နိုင်ငံနဲ့များ ကွာလိုက်တာလို့ စဉ်းစားမိတယ်။ ကျွန်တော်တို့ဆီမှာ အကြွေးစေ့တောင် အခုနောက်ပိုင်း လူငယ်တွေ မြင်ဖူးမှာ မဟုတ်တော့ပါဘူး။
ကြီးကြီးကျယ်ကျယ်တွေ လျှောက်ပြောနေတာ မဟုတ်ပါဘူး။ မြန်မာတွေ တွေးတတ်ဖို့ လိုနေပါပြီး။ ငွေကြေး ဖောင်းပွနေတာကို မချနိုင်တာတောင် တဖြည်းဖြည်းတော့ လျှော့နည်းလာပြီး။ မြန်မာငွေ တစ်ကျပ်ဆိုလည်း တစ်ကျပ် တန်ဖိုးရှိအောင် တာဝန်ရှိသူတွေ လုပ်ပေးကြရင် ယနေ့မြန်မာတွေ ကမ္ဘာမှာ ပြန်ထွန်းတောက် လာအုံးမှာပါ။ ကျွန်တော်တို့ နိုင်ငံငွေကြေးတွေက လေလံပစ်နေသလိုပဲ လစာတွေ ဘယ်လောက်တိုးတိုး ကုန်ဈေးနှုန်းက အဆမတန် တက်နေတော့ ဘာမှမထူးဘူး။ ကျွန်တော့်အသိတစ်ယောက်က လွန်ခဲ့တဲ့ ၈ နှစ်လောက်က နိုင်ငံခြားကနေ ပြန်လာတယ် သူနဲ့ကျွန်တော် မန္တလေးမှာ ထိုးမုန့်(၁၀)ဗူးနဲ့ ယို(၅)ဗူး ၀င်ဝယ်တာ ကုန်ကျငွေက တစ်သောင်း နီးပါးလောက်ကျတယ်။ သူကစနောက်ပြီး ပြောတယ်။ မင်းတို့ မြန်မာနိုင်ငံကလည်းကွာ ပိုက်ဆံအိတ်ကို ဖောင်းကားနေအောင် ငွေတွေထည့်လာတာတောင် ဘာမှဝယ်လို့ မရဘူး။ သူက ပိုက်ဆံအတန်ကြီးတွေ ကိုင်ပြီး ကျွန်တော့်ကို ထပ်ပြောတယ်။ နိုင်ငံခြားမှာ ဒီလိုကိုင်နိုင်ရင် အဲဒီတစ်လလုံး ဒါမှမဟုတ် အဲဒီအတောအတွင်းမှာ မင်းသူဌေးပဲ၊ မင်းဝယ်ချင်တာ ၀ယ်နိုင်တယ်လို့ ပြောသွားတယ်။ ကျွန်တော်ကလည်း ရယ်စရာတွေးလိုက်ပါတယ်။ ငါတို့မြန်မာတွေ မဆိုးဘူးကွ။ သူများတွေက တစ်ကျပ်နှစ်ကျပ် တစ်ရာတန်လောက်နဲ့ အလုပ်ရှုပ်နေချိန်မှာ မြန်မာနိုင်ငံမှာက အတန်ကြီးတွေနဲ့ သူဌေးဖြစ်နေတာ.... တကယ်တော့ ငွေကြေးတန်ဖိုး ဘာမှန်းမသိ ဖြစ်နေကြတာပါ။ ငွေအမောက်တွေ အများကြီးကိုင်ပြီး မိမိကိုယ်ကိုလည်း လုံခြုံမှုမဖြစ်နိုင်ဘူး။ ထို့ကြောင့် လုပ်နိုင်မယ်ဆိုရင် မြန်မာနိုင်ငံကြီး ပြုပြင်တဲ့ စနစ်တွေထဲမှာ ဒီငွေကြေး အဆင့်တွေကိုလည်း ပြန်ပြီး သုံးစေချင်တယ်လို့ ပြောချင်ပါတယ်။ ပိုက်ဆံ အရွက်ကြီးတွေ ဘယ်လိုကိုင်ပြီး သုံးသုံး ငယ်ငယ်က တစ်မတ် ငါးမှုး တစ်ကျပ် ခေတ်ကိုပဲ ပြန်တမ်းတ၍ ရေးလိုက်ခြင်း ဖြစ်ပါသည်။ ခေတ်နောက်ပြန် ဆွဲခြင်းမဟုတ်ပါ။ ငွေကြေးတစ်ကျပ်သည် တိုးတက်တဲ့ နိုင်ငံတိုင်းမှာ သုံးစွဲနေတုန်းဆိုတာ ကျွန်တော်တို့ မြန်မာတွေ အလေးထား စေချင်ပါကြောင်း ယခင် သုံးစွဲခဲ့ကြသည့် ပိုက်ဆံများအား စုစည်း တင်ပြလိုက်ပါသည်။
NPNGMP
0 comment:
သင့်အကြံပြုချက်တွေကို လေးစားစွာ ဖတ်ရှုပေးပါမည်။ ကျေးဇူးတင်ပါသည်။