8:02 AM
NPNG(MyanmarP)
ကြီးပွားတိုးတက်လိုသူတိုင်း ထားရှိရမည့် အရည်အချင်းကောင်း တစ်ခုမှာ ဗြဟ္မစိုရ်တရား ပွားများခြင်း ဟူသော မြတ်သောအကျင့်ကို ကျင့်သုံးနိုင်ခြင်းဖြစ်သည်။
ဗြဟ္မစိုရ်အကျင့် ဆိုသည်မှာ မေတ္တာ၊ ကရုဏာ၊ မုဒိတာ၊ ဥပေက္ခာတရားများကို လက်ကိုင်ထား ကျင့်သုံးခြင်း ဖြစ်သည်။တစ်ဦးနှင့်တစ်ဦးအပေါ် ကောင်းကျိုးလိုလားကာ မေတ္တာတရားရှိနေသမျှ မည်သည့် ပဋိပက္ခမျှ ဖြစ်ပေါ်မည်မဟုတ်။ တစ်ဦးပျက်စီးရာ ပျက်စီးကြောင်းကို တစ်ဦးကလိုလားပြီး မေတ္တာ မထားနိုင်လျှင်သာ ပဋိပက္ခများ ဖြစ်ပေါ်နေမည် ဖြစ်သည်။
မိမိဘ၀တိုးတက်ရန်၊ မိမိ မိသားစုတိုးတက်ရန်၊ မိမိနိုင်ငံတိုးတက်ရန်အတွက် တစ်ပါးသူကို အားကိုး၍မရ။ မိမိကိုယ်ပိုင် အရည်အချင်း ပေါ်၌သာ မူတည်ပေသည်။ လူတိုင်းသည် လုပ်ငန်းစွမ်းဆောင်နိုင်မှု၊ ကြိုးစားအားထုတ်မှု၊ ရိုသေထိုက်သူကို ရိုသေမှု၊ ပူဇော်ထိုက်သူကို ပူဇော်မှု စသည့် ကိုယ်ပိုင်အရည်အချင်း အရည်အသွေးနှင့် ပြည့်စုံနေရမည်ဖြစ်သည်။
လူတိုင်းသည် မိမိတို့၏ဘ၀ ကြီးပွားတိုးတက်ရေးအတွက် ရည်မှန်းချက်ပန်းတိုင် ထားရှိဆောင်ရွက်ကြမှသာ ကြီးပွားတိုးတက်မည် ဖြစ်သည်။ စီးပွားဖွံ့ဖြိုးတိုးတက်မှုအတွက် ရည်မှန်းချက်၊ ပညာရေး ထွန်းပေါက်ရန်အတွက် ရည်မှန်းချက် စသည်ဖြင့် ရည်မှန်းချက်တစ်ခုခုကို ဦးတည်ပြီး ကြိုးပမ်းအားထုတ် စွမ်းဆောင်ကြရမည်ဖြစ်သည်။
လူမှုပတ်ဝန်းကျင် အသိုင်းအ၀ိုင်းတွင် ရည်မှန်းချက်ပန်းတိုင်ကို ဦးတည်ဆောင်ရွက်ရင်း ကျင့်ဝတ်စည်းကမ်းတို့ကို သိရှိလိုက်နာဆောင်ရွက်ခြင်းဖြင့် ပညာရေး၊ စီးပွားရေး၊ ကုသိုလ်ရေးတို့ ဆောင်ရွက်ရာတွင် အောင်မြင်မှုရရှိပြီး သူတစ်ပါး၏ ကူညီထောက်ပံ့မှုကိုလည်း ရရှိနိုင်သည်။ မိမိအတွက် ထာဝရမိတ်ဆွေကောင်းကို ရရှိနိုင်သည်။ မိမိအခက်အခဲ တွေ့ရာ ၌ ထာဝရမိတ်ဆွေသည် အချိန်အခါ နေရာဒေသမရွေး ကူညီဖေးမှု ပြုမည်သာဖြစ်သည်။
လူတိုင်းသည် စိတ်ဓာတ်ကောင်းမွန်ရန်အတွက် အရေးကြီးသည်။ မိမိ၏စိတ်ကို မိမိသာ ပြုပြင်၍ရ၏။ စိတ်ကောင်းထားက မိမိ၏လုပ်ဆောင်မှုများသည် အခက်အခဲမရှိ အောင်မြင်နိုင်သည်။ ထို့ကြောင့် စိတ်ကောင်း စေတနာကောင်း ထားရှိ မွေးမြူကြရမည် ဖြစ်သည်။ စိတ်ရင်းစေတနာ ဖြူစင်မှ တိုးတက်မှုရရှိမည်။ တိုးတက်မှုအတွက် ကောင်းသော ယှဉ်ပြိုင်မှုနှင့် ယှဉ်ပြိုင်ကြရမည်ဖြစ်သည်။
မည်သူတရားပျက်ပျက် ကိုယ်မပျက်ရ။ မေတ္တာသည် မိမိကို အကျိုးပြု၏။ လူတိုသ်းသည် တစ်ဦးနှင့် တစ်ဦး အပြစ်မမြင် မေတ္တာနှင့်ယှဉ်၍ အရာရာကို ဆောင်ရွက်ကြမည်ဆိုပါက ရည်မှန်းသည့် ပန်းတိုင်ကို မလွဲမသွေ ရောက်ရှိမည်ဖြစ်ပါကြောင်း ရေးသားလိုက်ပါသည်။
(၂၀၁၀ ခုနှစ် နိုဝင်ဘာလ ၈ ရက်နေ့ သတင်းစာတွင် ဖော်ပြခဲ့သည့် အယ်ဒီတာတစ်ဦး၏ အာဘော်ဖြစ်သည်။)
NPNGMMP
0 comment:
သင့်အကြံပြုချက်တွေကို လေးစားစွာ ဖတ်ရှုပေးပါမည်။ ကျေးဇူးတင်ပါသည်။